Joan den igandean amaitu zen X-Pyr 2026 lasterketa, Pirinioak zeharkatzen dituen hike & fly modalitateko munduko proba ospetsuenetako bat. Aurtengo edizioa bero handiak, ekaitzak eta haize indartsuek baldintzatu dute, parte-hartzaile guztientzat erronka handia bihurtuz. Hala ere, historiako finisherren errekorra ezarri da: guztira 36 pilotuk lortu dute Hondarribia eta El Port de la Selva arteko ibilbidea osatzea.
Aurtengo edizioak beste mugarri garrantzitsu bat ere utzi du. Sei emakumek hartu zuten irteera Hondarribian, eta horietatik hiruk helmugara iristea lortu zuten. X-Pyrren historian lehen aldia da emakumezko hiru pilotuk proba amaitzea.
Sailkapen nagusian, Chrigel Maurer suitzarrak berriro ere bere nagusitasuna erakutsi zuen eta beste garaipen bat gehitu zion bere ibilbide ikusgarriari, hike & fly modalitateko munduko erreferente nagusietako bat dela berretsiz.
Euskal Aire Kirol Federaziotik bereziki nabarmendu nahi dugu euskal selekzioko bi ordezkarien lana. Mattin Iñiguez eta Aner Bueno pilotuek arrakastaz osatu zuten Hondarribiatik El Port de la Selvako helmugarainoko ibilbidea, lau egun inguruan 500 kilometro baino gehiagoko distantzia gaindituz. Biek maila bikaina erakutsi zuten aste osoan zehar, hegaldian zein estrategia erabakietan. Euskal hegalariek lan bikaina egin dute baldintza meteorologiko oso zorrotzek markatutako edizio honetan. Haien emaitzek agerian uzten dute Euskal Herriko parapente pilotuen maila gero eta handiagoa dela eta nazioarteko proba garrantzitsuenetan lehiatzeko gaitasun osoa dutela.
Zorionak, Mattin eta Aner!